Објавени се лични писма што Натали Харп, блиска соработничка на американскиот претседател Доналд Трамп, му ги испраќала во 2023 година, а нивната содржина предизвика внимание поради исклучително емотивниот тон.
Во едно од писмата Харп му напишала на Трамп дека тој е „сè што ѝ е важно“ и дека никогаш не сака да го разочара. Во друго писмо пишувала дека ѝ недостига времето кога разговарале и за теми што не биле поврзани само со работата.
Писмата наводно биле напишани за време или по патувањата на Трамп во Шкотска и Ирска во 2023 година. Две од нив подоцна стигнале до новинарот и автор Мајкл Волф, кој ги искористил при подготовката на книгата „All or Nothing“, посветена на претседателската кампања на Трамп во 2024 година.
Особено внимание привлече делот во кој Харп пишувала за други жени во окружувањето на Трамп, наведувајќи дека им завидува на оние чија работа е да разговараат со него и „да изгледаат добро“.
Харп е долгогодишна соработничка на Трамп и во неговиот тим го добила прекарот „човек-печатач“, бидејќи редовно му подготвувала и печатела медиумски текстови и други материјали. Според објавените информации, таа е меѓу луѓето со значителен пристап до американскиот претседател.
Во друго писмо Харп му се извинила на Трамп по ситуација за време на патувањето во Шкотска, пишувајќи дека стравува оти го разочарала и дека не сака да му донесе „ништо друго освен радост“.
Волф тврди дека писмата ги добил од луѓе од кампањата на Трамп кои биле загрижени поради нивната блискост. Белата куќа, од друга страна, ја брани Харп и ја опишува како лојална и вредна соработничка.
Харп претходно работела како водителка на конзервативната телевизиска мрежа OAN, а во 2022 година директно му се приклучила на тимот на Трамп.
