Полската војска денеска објави дека руски воен хеликоптер од Балтичката флота синоќа го нарушил полскиот воздушен простор над Балтичкото Море.
Во официјална изјава објавена на платформата X, полската армија соопшти дека овој инцидент е уште еден обид на Русија да ја тестира подготвеноста на полските системи за воздушна одбрана, пренесе агенцијата Ројтерс.
Во последно време, руски воени авиони, беспилотни летала и ракети сѐ почесто го нарушуваат полскиот воздушен простор, особено додека ги таргетираат областите во западна Украина. Секој ваков инцидент ги активира системите за воздушна одбрана на Полска и носи дополнителни тензии во регионот.
Полските власти ја осудија последната повреда на воздушниот простор и најавија дека внимателно ќе ги следат сите активности на руските сили во близина на границите на НАТО.
