Од почетокот на руската инвазија на Украина, едно оружје се издвои како симбол на современиот конфликт – дронот. Од скапите турски Bayraktar-и до обични FPV дронови купени на интернет, овие беспилотни летала ја трансформираа воената тактика, предизвикувајќи хаос и огромни загуби на бојното поле.
Во новата епизода на подкастот „Прва линија“, воениот аналитичар Виктор Трумбеташ открива како дроновите – од копнени до поморски – буквално ја презеле контролата врз фронтот. Шокантно е тоа што најголемиот ефект го имаат дронови кои чинат неколку стотини евра, а можат да уништат милионски тенк или да ликвидираат цел вод.
„Гледаме тотално поместување на моќта. FPV дроновите денес не само што извидуваат – тие убиваат. И тоа масовно“, вели Трумбеташ.
Од првите обиди на Германците во Првата светска војна, преку израелските иновации во 70-тите, до денешните фронтови во Донбас – дроновите преминаа од експеримент во доминантно оружје. Војната во Украина, вели Трумбеташ, е првиот глобален конфликт каде евтини комерцијални дронови имаат стратегиско влијание.
Посебно внимание привлекуваат руските „Ланцети“, иранските „Шахеди“, како и украинските импровизирани FPV летала кои се водат од војници во прво лице, често претворајќи ги во самоубиствени мисии.
Што значи ова за иднината на војувањето? Дали армиите ќе мора да се адаптираат или ќе бидат прегазени од технолошки понапредни, но евтини и масовни дронови? И зошто класичната артилерија и тенкови веќе не се најстрашното оружје на фронтот?
Одговорите – и снимки кои не се за чувствителни гледачи – ќе ги најдете во средината на текстот!
