Трамп предлага значително намалување на царините за Кина пред важни трговски преговори
Американскиот претседател Доналд Трамп денеска предложи намалување на царините за кинеските производи од 145 на 80 проценти, како дел од обидите за деескалација на трговската војна со Пекинг.
Оваа иницијатива доаѓа во пресрет на претстојниот состанок на американската и кинеската делегација, закажан за викендов во Женева. Средбата ќе биде прва од ваков обем откако САД воведоа високи царини на увозот од Кина во април, што доведе до возвратни мерки од страна на кинеските власти.
Американскиот министер за финансии, Скот Бесант, и трговскиот претставник Џејмисон Грир ќе ги предводат разговорите со кинеската делегација во Швајцарија. Засега не се откриени детали за агендата, но се очекува фокусот да биде ставен на царинските олеснувања и повторно отворање на дијалогот за рамноправна трговија.
Во моментов, американските царини на кинеските стоки изнесуваат 145 проценти, додека Кина наплатува 125 проценти царина за увоз од САД. Предлогот на Трамп би претставувал значително намалување на економските тензии меѓу двете најголеми светски економии.
