Страшна несреќа ја потресе Франција, откако две мали деца на возраст од три и пет години го загубија животот во силна експлозија што се случила во приземјето на станбена зграда во градот Треву, кој се наоѓа во департманот Ен. Трагичниот настан, според информациите од локалните власти, се случил вчера околу 17:30 часот и предизвикал огромен шок кај жителите на градот.
Експлозијата одекнала во четирикатна зграда со околу 20 станови, по што на местото на настанот веднаш пристигнале екипи на итната медицинска помош, пожарникарите и спасувачките служби. И покрај брзата реакција и обидите за реанимација, лекарите не успеале да ги спасат двете деца, кои им подлегнале на тешките повреди. Градоначалникот на Треву потврди дека станува збор за брат и сестра, што дополнително ја продлабочи трагедијата.
Во експлозијата биле повредени повеќе лица. Десетмина добиле полесни повреди и биле пренесени во болници во регионот за дополнителни прегледи, додека уште три лица самостојно побарале медицинска помош поради последиците од инцидентот.
Според првичните информации, во станот каде што дошло до експлозијата во моментот на несреќата се наоѓала жена со своите три деца. Жената и најстарото дете ја преживеале експлозијата, додека двете помали деца, и покрај укажаната медицинска помош, подоцна починале од здобиените повреди.
Поради опасност од дополнителни оштетувања и заштита на жителите, околу 30 лица биле итно евакуирани од зградата. Голем дел од нив биле во состојба на силен шок, а на терен биле ангажирани и психолошки тимови за прва поддршка. Пожарникарските и спасувачките служби, со помош на специјализирани единици, работеле на обезбедување на објектот сè до доцните вечерни часови.
Експлозијата предизвикала и значителна материјална штета во пошироката околина. Оштетени се и две блиски училишта, поради што локалните власти најавија организирање психолошка поддршка за учениците и наставниот кадар. Иако зградата не се урнала, надлежните институции информираат дека нејзината конструкција е сериозно ослабена и ќе следуваат дополнителни безбедносни проценки.
Истрагата за причините за експлозијата е во тек, а надлежните најавуваат дека јавноста ќе биде навремено информирана за сите нови сознанија поврзани со оваа трагедија што ја потресе целата земја.
