Албанскиот премиер Еди Рама најави дека следната недела парламентот во Тирана ќе гласа за резолуција со која Исламската Република Иран би била прогласена за државен спонзор на тероризмот. Предлогот веќе е поднесен од шефот на пратеничката група на социјалистите, Таулант Бала, но се работи за нацрт-резолуција што допрва треба да биде усвоена.
Нацрт-документот не се ограничува само на политичка осуда на Техеран. Тој предвидува и Иранската револуционерна гарда да биде означена како терористичка организација, а во дел од извештаите исто така се спомнува и Хезболах. Резолуцијата го осудува и сериозниот раст на кибернапади врз албанските институции, вклучувајќи го нападот од 2022 година врз државната инфраструктура и поновите обиди за упад во системите на албанскиот парламент.
Овој чекор е дел од долгорочната ескалација меѓу Тирана и Техеран. Албанија уште во септември 2022 година ги прекина дипломатските односи со Иран, обвинувајќи го за масовни сајбернапади. Со новата резолуција, спорот се подига на повисоко меѓународно ниво, а во случај на усвојување, текстот ќе биде доставен и до сојузничките земји, како и до меѓународни институции, меѓу кои Обединетите нации и Европската Унија.
