Новиот украински министер за одбрана, Михајло Федоров, предизвика бурни реакции со својата директна и без задршки изјава за воените приоритети на Украина. На прес-конференција посветена на неговиот мандат, Федоров отворено зборуваше за стратегијата што, според него, треба да го промени текот на војната.
Тој нагласи дека реформите во одбранбениот систем ќе се водат по строги критериуми на ефикасност. Според Федоров, секој што нема јасно мерливи резултати нема да има место во системот. „Управувањето мора да биде фокусирано на луѓе кои испорачуваат резултати, а не на формални позиции“, истакна тој.
Како втор и клучен приоритет, министерот го наведе драстичното зголемување на загубите на руската армија. Според неговите зборови, целта е бројот на убиени руски војници да достигне 50.000 месечно. Тој додаде дека, според украинските проценки, во претходниот месец биле елиминирани околу 35.000 руски војници, а овие податоци биле документирани со видео-докази.
Федоров смета дека ваквото темпо на загуби би имало сериозно влијание врз руската воена способност, посочувајќи дека Москва, како што рече, ги третира луѓето како потрошлив ресурс, чиј недостиг веќе почнува да се чувствува.
Иако ниту Русија ниту Украина редовно објавуваат официјални бројки за загубите, Киев тврди дека од почетокот на целосната инвазија вкупните руски жртви – вклучувајќи загинати, ранети и исчезнати – надминале 1,2 милиони лица.
