Во Минеаполис повторно се вжешти ситуацијата кога федерален агент на Службата за имиграција и царина (ICE) застрела маж кој го нападнал со лопата за време на апсење, соопшти Министерството за домашна безбедност на САД. Инцидентот се случи по интензивна автомобилска потера по државјанин на Венецуела кој нелегално престојувал во земјата и заврши со сообраќајна несреќа.
Според официјални извори, при обидот за апсење, уште две лица од блискиот стан се вмешале и заедно со осомничениот го нападнале агентот, користејќи лопата и дршка од метла. Во одбранбени истрели, агентот ранил еден од напаѓачите, кој подоцна се забарикадирал во куќа со уште три лица. Специјализиран тим на ICE ги привел сите лица на местото, а ФБИ отвори истрага за случајот.
По инцидентот, во населбата Хоторн избувнаа судири меѓу демонстранти и полицијата. Локалните власти повикаа на мир, додека градоначалникот Џејкоб Фреј оцени дека присуството на федерални агенти создава „неодржлива“ состојба. Претседателот Доналд Трамп се закани со повикување на Законот за побуна, додека гувернерот на Минесота, Тим Волц, ја критикуваше „окупацијата“ од страна на ICE.
Овој инцидент само ја продлабочува кризата која избувна на 7 јануари, кога агент на ICE ја уби 37-годишната Рене Никол Гуд. Случајот е дел од тековна истрага, додека граѓаните и властите се соочуваат со растечкиот гнев и страв од нови пресметки.
