Иранскиот претседател Masud Pezeshkian ја изнесе својата позиција за завршување на конфликтот со САД и Израел. Тој истакна дека секој договор за прекин на огнот мора да вклучува исплата на воени репарации и цврсти гаранции од САД дека нема да следуваат идни напади врз Иран.
– Во разговорот со лидерите на Русија и Пакистан, ја потврдив посветеноста на Иран на мирот во регионот. Единствениот начин да се стави крај на оваа војна – иницирана од ционистичкиот режим и САД – е да се признаат легитимните права на Иран, да се платат воени репарации и да се обезбеди цврста меѓународна гаранција против идна агресија – напиша Пезешкијан на мрежата X.
Според извори на Блумберг, Иран ќе прифати прекин на огнот само ако договорот вклучува гаранција од САД и Израел дека нема да има идни напади врз Исламската Република. Ова барање веројатно ќе биде тешко прифатено во Вашингтон и Ерусалим.
Американскиот претседател Donald Trump, пак, повтори дека САД мораат да ја завршат операцијата. Во говорот во Кентаки, тој рече дека Иран не очекувал ударите, а американската армија уништила 54 брода за два дена.
– Мора да ја завршиме работата. По операцијата мислевме дека тоа ќе биде нивниот крај за некое време. Но, тие повторно почнаа. Затоа мора да ја завршиме, нели? Не сакаме да се враќаме тука на секои две години – рече Трамп.
