Украински дронови по третпат го погодија важното нафтено чвориште во Црното Море, во градот Туапсе, предизвикувајќи нов пожар во стратешката рафинерија која веќе беше мета на повеќе напади. Со тоа, еколошката состојба во регионот дополнително се влошува, додека дел од локалните жители сè погласно ги обвинуваат властите и Владимир Путин дека ја минимизираат реалната ситуација.
Регионалните власти соопштија дека остатоци од дрон предизвикале пожар во објект во сопственост на Росњефт, во текот на ноќта меѓу понеделник и вторник. Во гаснењето биле ангажирани повеќе од 120 спасувачи и десетици возила.
Жителите пријавиле повеќе експлозии по два часот по полноќ, по што следеле силни пламени јазици и густ чад што се издигнувал над градот. Ова е трет напад врз рафинеријата во Туапсе за помалку од две недели, по претходните удари на 16 и 20 април, кои предизвикале сериозни пожари, оштетувања на резервоари и прекин на работата на постројката. Во еден од тие напади, според извештаите, загинало едно лице.
Рафинеријата се смета за една од десетте најголеми во Русија и има клучна улога во извозот на гориво преку црноморските пристаништа. Поради оштетувањата и пожарите, испораките се сериозно нарушени, а работата на објектот е стопирана.
Поради зголемената опасност, воведени се и привремени ограничувања на летовите на аеродромите во Краснодар, Геленџик и Сочи.
Во меѓувреме, дел од жителите преку социјалните мрежи изразуваат сомнеж дека властите не ја прикажуваат вистинската слика за настаните, тврдејќи дека нападите се претставуваат како помали инциденти отколку што навистина се.
Еколошката штета продолжува да расте. Истекување на нафта од претходните напади се проширило на околу 77 километри долж брегот на Црното Море за само неколку дена. Иако властите наведуваат дека се собрани над 4.000 кубни метри загадена почва и вода, загадувањето и натаму се шири.
Густ чад од пожарите покрил голем дел од јужна Русија, вклучувајќи ги Сочи и Анапа, а во некои области жителите пријавиле појава на т.н. „нафтен дожд“. Официјалните мерења покажале зголемени нивоа на штетни материи како бензен и ксилен, во одредени случаи и до двојно над дозволените граници.
Последиците врз природата се сериозни – пријавено е угинување на риби и птици, а мртви делфини биле пронајдени на брегот во близина на Сочи.
Рафинеријата во Туапсе, која има капацитет да преработува околу 12 милиони метрички тони нафта годишно, сè уште е надвор од функција, без јасен рок кога ќе продолжи со работа.
И покрај сериозноста на ситуацијата, Кремљ засега нема јавно дадено детални коментари. Во исто време, Владимир Путин продолжува со редовните активности и јавни настапи.
Во поширокиот контекст, Украина значително го зголемила дометот на своите напади, кој сега достигнува околу 1.750 километри во внатрешноста на Русија. Од Министерството за одбрана на Украина наведуваат дека ваквите далекусежни операции станале клучен дел од стратегијата, овозможувајќи напади врз важни воени и енергетски цели.
Претседателот Володимир Зеленски изјави дека овие напади носат сериозни загуби за Русија, кои се мерат во десетици милијарди долари, и претставуваат значајна промена во текот на конфликтот.
