Американскиот претседател Доналд Трамп го опиша својот телефонски разговор со украинскиот претседател Володимир Зеленски како „многу добар“ и „стратешки важен“, додека во исто време упати остри критики кон рускиот претседател Владимир Путин. Трамп истакна дека САД ќе продолжат да ја поддржуваат Украина, особено со потребните ракетни системи за одбрана, и изрази разочараност поради Путин, кој според него сака „да оди до крај и да продолжи да убива луѓе“.
Во разговор со новинарите, Трамп нагласи дека ситуацијата во Украина е „многу тешка“ и дека ќе се види како ќе се развиваат настаните. Тој ги потврди информациите дека поради проблеми со снабдувањето, САД засега ја суспендирале испораката на одредени ракетни системи за воздушна одбрана, но додаде дека Украина сепак ќе има потреба од помош.
Овие изјави доаѓаат веднаш по телефонскиот разговор меѓу Трамп и Путин, каде американскиот претседател го опиша рускиот лидер како незаинтересиран за прекин на огнот и решен да ја продолжи војната.
Украинскиот претседател Зеленски исто така потврди дека разговорот бил квалитетен и дека САД се посветени на поддршка на Украина во нејзината борба против руската инвазија.
