Во училиштата низ Русија се подготвува воведување на нов наставен предмет кој веќе предизвикува поделени реакции во јавноста. Од учебната 2026–2027 година, учениците во петто одделение ќе започнат да го изучуваат предметот „Духовно-морална култура на Русија“, дисциплина која, според образложението на властите, има за цел да ги воспитува младите генерации во духот на традиционалните руски вредности.
Програмата е изработена во соработка со митрополитот Тихон (Шевкунов), а методолошката рамка ја подготвил Московски државен педагошки универзитет. Предметот нема да остане ограничен само на петто одделение – од учебната 2027–2028 година постепено ќе бидат опфатени и учениците во шесто и седмо одделение. Вкупно се предвидени 85 наставни часа.
Со цел да се обезбеди простор во распоредот, ќе се намали фондот на часови по англиски јазик – од три на два часа неделно. Токму оваа одлука предизвика критики кај дел од јавноста, која смета дека се намалува вниманието кон странските јазици на сметка на новата идеолошко-вредносна содржина.
Целта на курсот, според најавите, е учениците да се запознаат со концепти како патриотизам, граѓанска одговорност, значењето на семејството дефинирано како заедница меѓу маж и жена, зачувување на историската меморија, творештвото и верата во Бога. За илустрирање на овие вредности ќе се користат примери од историјата и современото време.
Меѓу личностите кои ќе бидат обработувани во наставата се кнезот Александар Невски, поетот Александар Пушкин, космонаутот Јуриј Гагарин и разузнавачот Рихард Зорге. Нивните животи и дела ќе служат како примери за патриотизам, пожртвуваност и национална гордост.
Посебно внимание ќе биде посветено и на современи теми, вклучително и настаните што руските власти официјално ги нарекуваат „специјална воена операција“ во Украина. Во таа рамка, ќе се обработуваат и примери на современа храброст и жртва.
Во наставата ќе бидат вклучени и религиозни примери на благочестие, како животот на великата кнегиња Елисавета Фјодоровна и протојерејот Михаил Василиев, кој загина во Херсонската област во 2022 година.
Воведувањето на „Духовно-морална култура на Русија“ отвори поширока дебата за тоа каде е границата меѓу образованието, религијата и државната идеологија, како и каква улога треба да има училиштето во обликувањето на вредносниот систем на младите генерации.
