Силен земјотрес со јачина од 8,8 степени што го погоди рускиот полуостров Камчатка предизвика паника не само кај луѓето, туку и кај животните. На социјалните мрежи се појави драматично видео снимено од туристички и блогерски брод во близина на епицентарот, на кое се гледа како морски лавови во паника скокаат во морето во моментот на потресот.
Снимката е направена кај стрмните карпи на островот Анциферов, каде поради силата на потресот, делови од карпите се уриваат и паѓаат во морето. Вознемирените морски лавови веднаш го напуштаат копното, чувствувајќи дека водата е побезбедна.
Авторот на видеото, блогерот Иван Герасименко, се затекнал на експедиционен брод во близина на островот Парамушир кога се случил земјотресот.
„Бевме блиску до малиот остров Анциферов кога се случи потресот. Камења се одвојуваа од карпите, леташе сè, а морските лавови скокаа во вода“, напиша тој на социјалните мрежи, објавувајќи го видеото.
Во текот на денот пристигнаа и снимки од мртви китови кои биле забележани како плутаат во водите на Русија и Јапонија или како се изфрлени на брегот, што предизвика стравувања дека и морските лавови можеби завршиле исто. Сепак, научниците сè уште не го утврдиле точниот причинител на нивната смрт, а морските лавови се генерално поотпорни на подводни промени.
Инаку, земјотресот предизвика и цунами бранови високи и до пет метри и поттикна налози за евакуација, дури и до Хаваи и преку целиот Тих океан.
ВИДЕО
