Вештачката интелигенција би можела целосно да го промени начинот на кој живееме и работиме, а според Илон Маск, светот се движи кон сценарио во кое класичните работни места ќе станат избор, а не потреба.
Во своја објава, Маск истакна дека со напредокот на технологијата, луѓето повеќе нема да мора да работат за да преживеат, туку ќе работат само ако сакаат. Тој смета дека ќе се создаде систем во кој секој ќе има пристап до таканаречен „универзален висок приход“, односно финансиска сигурност што ќе им овозможи на луѓето слободно да одлучуваат како ќе го поминуваат времето.
Оваа визија доаѓа во време кога вештачката интелигенција веќе почнува да ја менува глобалната економија. Маск предвидува дека автоматизацијата преку роботи и AI ќе доведе до огромно производство на стоки и услуги, што ќе ги намали цените до степен каде парите ќе имаат сосема поинаква улога од денес.
Според него, иднината би можела да наликува на свет од научна фантастика, каде луѓето работат од љубопитност или задоволство, а не од нужда. Наместо трка за опстанок, фокусот би се префрлил на креативност, развој и лични интереси.
Сепак, реалноста во моментов покажува и поинаква слика. Во последниот период, бројни технолошки компании отпуштаат илјадници работници токму поради автоматизацијата. Некои експерти предупредуваат дека транзицијата може да биде тешка и дека е потребно време, како и сериозни инвестиции во преквалификација на работната сила.
Додека Маск гледа оптимистички на иднината и верува дека исходот ќе биде позитивен за човештвото, дебатата останува отворена – дали вештачката интелигенција ќе донесе слобода или нови предизвици за милиони луѓе ширум светот.
