Италија прогласи вонредна состојба по силното невреме што зафати јужните региони, оставајќи зад себе разорени патишта, поплавени населби и свлечишта. Владата на премиерката Џорџа Мелони веднаш реагираше со итна финансиска помош, издвојувајќи 100 милиони евра за санација и поддршка на погодените бизниси.
Два дена дивееја обилни дождови, бранови високи до девет метри и жестоки ветрови на Сицилија, Сардинија и Калабрија. Крајбрежните бариери беа урнати, а делови од внатрешноста на овие региони целосно поплавени. И покрај катастрофалните последици, среќа е што засега нема загинати.
На Сицилија, силните дождови предизвикаа свлечишта што ја загрозуваат безбедноста на илјадници луѓе. Во Нишеми, Калтанисета, околу 1.000 жители беа евакуирани, а училиштата затворени. Едно од најголемите свлечишта се протега на четири километри, со длабочина до шест метри, од Белведере до локалниот пат број 10.
Градоначалникот Масимилијано Конти предупреди дека нови свлечишта постојано се појавуваат. „Ноќта се отвори вертикален расцеп од 25 метри. Работиме со цивилната заштита за да најдеме решение и да обезбедиме алтернативни патишта, за градот да не остане изолиран“, изјави тој.
Невремето ја покажа суровата сила на природата и ја доведе Италија на работ – штетите се огромни, а граѓаните и властите се борат за секоја улица и дом.
