Лидерите од муслиманскиот свет упатија жестоки осуди и повик за обединета акција против Израел, откако Катар во Доха беше домаќин на вонреден арапско-исламски самит. Настанот дојде по израелскиот напад врз претставниците на Хамас токму во главниот град на Катар, што ја крена тензијата на највисоко ниво.
Катарскиот емир шеик Тамим бин Хамад Ал Тани го нарече нападот „кукавички и предавнички“, нагласувајќи дека лидерите на Хамас во моментот го разгледувале американскиот предлог за прекин на огнот, пренесен преку Катар и Египет.
Турскиот претседател Реџеп Таип Ердоган пак, предупреди дека Израел се однесува како „терористичка држава која се храни со хаос и крв“, повикувајќи на засилени дипломатски напори и воведување нови санкции.
Сериозно предупредување испрати и египетскиот претседател Абдел Фатах ел Сиси, кој рече дека постапките на Израел ја загрозуваат иднината на мирот и ризикуваат враќање на регионот во состојба на постојан конфликт.
Јорданскиот крал Абдула Втори побара решителен и јасен регионален одговор, истакнувајќи дека „заканата од Израел не познава граници“.
Иранскиот претседател Месуд Пезешкиан го осуди нападот врз Катар како „очигледен чин на тероризам“ и повика на исламско единство против Израел.
Сето ова се случува во време кога Израел е обвинет од бројни меѓународни организации, па дури и од најголемата светска група научници за геноцид, дека спроведува геноцид врз Палестинците во Газа, каде во речиси двегодишната воена кампања загинаа над 64.000 луѓе.
Самитот во Доха покажа дека муслиманските држави се повеќе го гледаат Израел како закана за мирот во регионот и најавија заеднички чекори во одбрана на своите интереси и стабилноста на Блискиот Исток.
