Ирански беспилотни летала овој понеделник извршија напади врз три објекти на Amazon Web Services (AWS) во Обединетите Арапски Емирати и Бахреин, предизвикувајќи глобални прекини во интернет услугите, пренесува Futurism. Експертите сметаат дека ова е прв пат американски технолошки компании да станат директна цел во воена операција.
Компанијата Amazon потврди дека нападите предизвикале структурни штети, привремени прекини на електричната енергија и интервенции за гаснење пожари што резултирале со дополнителни штети од вода. Според медиумите блиски до Иранската револуционерна гарда, и Microsoft бил таргетиран, иако официјално компанијата сè уште не пријавила прекини.
Нападите укажуваат на растечката важност на центрите за податоци на глобалното бојно поле. Блискиот Исток стана значаен регион за американските технолошки компании, кои вложуваат во моќни центри за податоци, особено поради развојот на вештачката интелигенција. Компании како OpenAI, Oracle и Nvidia веќе инвестираат во масивни кампуси и центри за податоци во регионот.
„Додека претходно таргетираа нафтени полиња, овие напади покажуваат дека центрите за податоци сега се сметаат за критична инфраструктура“, вели Патрик Марфи од Hilco Global.
Amazon соопшти дека се опоравува од штетите, но предупредува дека геополитичката нестабилност во Блискиот Исток продолжува да создава непредвидливост за нивните операции.
Ова е нова фаза во конфликтот, каде технологијата и информациските инфраструктури стануваат директни цели, што би можело да има глобални последици за интернет услугите и безбедноста на податоците.
