Полициски службеници од Полициското одделение Ропотово лишиле од слобода 38-годишен државјанин на Албанија, откако бил затекнат како предизвикува пожар на отворен простор во прилепскиот регион.
Според информациите од полицијата, на 23 октомври 2026 година, во 14:20 часот, на местото викано „Коливади“, во атарот на селото Житоше, полициските службеници го затекнале М.Џ. (38) како пали сува трева.
Пожарот бил изгаснат со интервенција на екипа од Територијалната противпожарна единица Прилеп, а за случајот бил известен и јавен обвинител.
По лишувањето од слобода, лицето било предадено во Одделението за внатрешни работи Прилеп. Од полицијата информираат дека по целосното документирање на настанот против него ќе биде поднесена пријава согласно член 288 од Кривичниот законик, кој се однесува на кривичното дело „Предизвикување на општа опасност“.
