Незадоволството од високите трошоци за живот, политичките одлуки и општествените реформи ги изнесе граѓаните на улиците во повеќе европски градови. На некои места протестите поминаа мирно, додека во други беа забележани судири со полицијата и интервенции на безбедносните сили.
Во Франција, протестите предизвикаа големо безбедносно ангажирање. Министерот за внатрешни работи Лоран Нуњез соопшти дека до 13 часот биле регистрирани 135 апсења низ земјата. Според Министерството за внатрешни работи, на протестите учествувале околу 410.000 луѓе, додека синдикатот CGT проценил дека бројката се приближила до 800.000, вклучувајќи околу 250.000 демонстранти во Париз.
Во француската престолнина полицијата употребила солзавец и водени топови против дел од собраните демонстранти. Нуњез изјавил дека биле регистрирани 136 јавни демонстрации, наспроти 264 претходната недела, но предупредил дека властите остануваат внимателни поради повиците за акција од екстремистички групи.
Главните причини за протестите во Франција се растот на цените, намалената куповна моќ, незадоволството од животниот стандард и барањата за поголеми инвестиции во јавните услуги и подобри услови во образованието.
ПРОТЕСТИ И ВО ТУРЦИЈА: НОВИНАРИТЕ БАРААТ СЛОБОДА НА МЕДИУМИТЕ
Истанбул и Анкара беа меѓу градовите во кои илјадници луѓе излегоа на протести против, како што наведуваат организаторите, зголемениот притисок врз новинарите во Турција.
Меѓу учесниците имало новинари, претставници на организации за човекови права и членови на опозициски партии. Демонстрантите протестирале против апсења, затворање медиуми и назначување државни управители во медиумски куќи.
На азиската страна на Истанбул се собрале најмалку 3.000 луѓе, според извештајот, носејќи фотографии од затворени новинари и транспаренти со пораки против цензурата и притисоците врз медиумите.
На протестите повикале повеќе новинарски организации, меѓу кои Синдикатот на новинарите на Турција, Здружението на новинарите на Турција и други професионални здруженија. Во заедничкото соопштение тие порачале дека ќе продолжат да се залагаат за правото на јавноста да биде информирана.
ДЕСЕТИЦИ ИЛЈАДИ ЛУЃЕ ВО МАДРИД ЗА ЈАВНИОТ ПЕНЗИСКИ СИСТЕМ
Во Мадрид, десетици илјади граѓани протестирале во одбрана на јавниот пензиски систем и против обидите за негова приватизација. Демонстрантите побарале мерки за зачувување на куповната моќ на пензионерите и зајакнување на нивната социјална заштита.
Според организаторите, на протестот учествувале околу 50.000 луѓе, додека владината делегација проценила дека бројката изнесувала околу 25.000, објави RTVE.
Протестот го организирала Државната координација за одбрана на јавниот пензиски систем COESPE. Учесниците марширале од железничката станица Аточа до улицата Алкала, поминувајќи покрај музејот Прадо. На транспарентите имало пораки за гарантирани пензии и заштита на пензиските права.
Протестите во различни европски земји имаат различни непосредни поводи, но меѓу главните теми се економската несигурност, социјалната заштита, образованието, политичките одлуки и слободата на медиумите.
