Најмалку 16 лица се повредени откако 19-годишен поранешен ученик отворил оган во училиште во Турција, а според последните информации, напаѓачот потоа си го одзел животот.
Инцидентот се случил во стручно-техничкото училиште „Ахмет Којуџу“ во округот Сиверек, во провинцијата Шанлиурфа, на југоистокот од земјата. Според извештаите, напаѓачот влегол во училишната зграда и почнал да пука со пушка, при што настанала паника и хаос меѓу учениците и наставниците.
Учениците во паника бегале од зградата, додека на местото веднаш пристигнале бројни екипи на итната помош и специјални полициски единици. Училиштето било евакуирано, а сите повредени биле итно префрлени во болницата во Сиверек.
Гувернерот на Шанлиурфа, Хасан Шилдак, потврдил дека меѓу повредените има ученици, наставници, еден полицаец и работник во училишната кантина. Тој додал дека напаѓачот извршил самоубиство кога полицијата се обидела да го уапси.
Според информациите, станува збор за поранешен ученик кој го напуштил училиштето по деветто одделение, а подоцна се запишал во отворена средношколска програма. Засега нема дополнителни информации.
