Шведската влада најави сериозно заострување на правилата за добивање државјанство, со нови барања што ќе значат подолг престој, задолжителен јазичен тест, финансиска стабилност и докажан „чесен начин на живот“.
Министерот за миграција Јохан Форсел ги нарече измените „историски“, нагласувајќи дека државјанството треба да биде финален чекор во процесот на интеграција, кој подразбира личен труд и одговорност.
Според предлогот, наместо досегашните пет години, кандидатите ќе треба да живеат најмалку осум години во Шведска. Дополнително, ќе се воведе тест за познавање на јазикот и општеството како услов за добивање пасош.
Планирано е и продолжување на периодот во кој криминалното досие може да влијае врз апликацијата – од 10 на 17 години за лица постари од 15 години.
Новина е и финансискиот критериум: апликантите ќе мора да имаат месечен приход од околу 20.000 шведски круни и да не користеле социјална помош повеќе од шест месеци во последните три години, освен ако станува збор за лица кои студираат.
Додека владејачките партии сметаат дека со ова се зголемуваат стандардите и одговорноста, опозицијата реагира остро. Од Левичарската партија предупредуваат дека мерките ќе создадат несигурност и дополнителен притисок врз имигрантите.
Доколку бидат усвоени, новите правила се очекува да стапат во сила на 6 јуни, националниот празник на Шведска.
