Хрватскиот физичар и политички аналитичар Тончи Тадиќ го коментираше нападот на САД и Израел врз Иран, оценувајќи дека станува збор за вистинска војна, а не за ограничена воена операција.
– Мислам дека е коректно да се зборува за војна на САД и Израел против Иран, а не за некаква ограничена воена операција. Обемот, размерот и траењето на нападите укажуваат дека се работи за војна. Целите што ги постави Доналд Трамп се вистински воени цели. Не станува збор за ништо ограничено – изјави Тадиќ.
Тој додаде дека е индикативна и брзината со која иранското раководство пронашло замени за ликвидираните државни функционери.
– И покрај очекувањата на САД и Израел дека обезглавувањето на државниот врв ќе доведе до брзи преговори, тоа не се случи. Режимот одамна подготвил замени и продолжува да функционира – истакна тој.
„Ако Иран има нуклеарно оружје, време е да го видиме“
На прашањето што ако Иран реши да употреби „валкана бомба“, Тадиќ одговори дека тоа брзо би се дознало. „Валканата бомба“ комбинира конвенционален експлозив со радиоактивен материјал, кој при експлозија може да се распрсне и да контаминира поширока област.
– И кај „валканата бомба“ и кај нуклеарната бомба има три аспекти: технологија, воена примена и политичка позадина. Употребата на нуклеарно оружје не значи пресврт во војната, туку отворање нуклеарна фаза на конфликтот. Ако нападите врз Иран продолжат со овој интензитет, тоа се околности во кои режимот, доколку навистина располага со нуклеарно оружје, би можел да го употреби – објасни Тадиќ.
Според него, ако Иран нема нуклеарно оружје, можно е да посегне по „валкана бомба“, но прашање е дали воопшто би можел да ја употреби на далечина кон Израел или американските сојузници на Блискиот Исток.
– Со тоа би постигнале само реципрочен одговор. Би се отворила нуклеарна фаза од војната што никому во Иран не може да донесе ништо добро – заклучи Тадиќ.
