Во еден од најсмртоносните напади во последните месеци, руските сили синоќа го бомбардираа казнено-поправниот дом во регионот Запорожје, при што животот го загубија најмалку 16 затвореници, а 35 лица се повредени. Зградите на затворот беа целосно уништени, додека оштетувања претрпеа и блиските приватни домови.
Истовремено, во серија ракетни напади во регионот Дњепропетровск загинаа уште двајца цивили, а беа погодени и важни здравствени објекти – породилиште и градска болница во градот Камјанске, каде што пет лица беа ранети, вклучително две жени во тешка состојба, една од нив бремена.
Локалните власти информираа дека биле испукани осум ракети, меѓу кои и силни авионски бомби, насочени кон Запорожје, регион често изложен на вакви воздушни напади од почетокот на војната во 2022 година.
Во Камјанске, покрај здравствените установи, беа оштетени и детската клиника, училишта, градинки и дури 49 станбени згради, додека неколку возила на паркингот на болницата целосно изгореа. Сите пациенти од погодените одделенија беа евакуирани во други здравствени институции.
Украинските власти го оценија нападот како уште едно брутално кршење на меѓународното хуманитарно право, а претседателот Володимир Зеленски повторно повика на засилена поддршка од сојузниците за справување со овие агресии.
