Портпаролката на Белата куќа, Каролин Ливит, денеска изјави дека неодамнешното магнетно-резонантно скенирање (МРИ) на претседателот Доналд Трамп било „превентивно“ и откри дека тој е во добра кардиоваскуларна состојба. Прегледот бил спроведен затоа што мажите на неговата возраст имаат корист од вакви скрининг тестови, објави Ројтерс.
Трамп бил подложен на МРИ за време на медицинската евалуација во октомври, но во тоа време не ја открил целта на постапката. Американскиот претседател денеска истакна дека е подготвен да ги објави резултатите од скенирањето, нагласувајќи дека наодите се „совршени“ и дека успешно го поминал когнитивниот тест.
„Ако сакате да го објавам, ќе го објавам“, рече Трамп на новинарите по враќањето во Вашингтон од Флорида, пренесе NBC.
Меѓутоа, тој додаде дека „нема поим“ кој дел од неговото тело бил скениран. „Тоа е само магнетна резонанца. Кој дел од телото? Не мозокот, направив когнитивен тест и растурив“, коментираше Трамп со својот препознатлив стил.
Коментарите на Трамп доаѓаат откако демократскиот гувернер на Минесота, Тим Волц, изјави за NBC News дека претседателот „физички ослабува“ и го доведе во прашање неговиот „ментален капацитет“, повикувајќи го да ги објави резултатите од МРИ.
Инаку, при средбата со новинарите, Трамп беше забележан со дамка на десната рака, според медиумските извештаи.
79-годишниот Трамп потврди дека скенирањето било спроведено во Медицинскиот центар „Волтер Рид“ на 10 октомври, но ниту тој, ниту Белата куќа, не прецизираа кој дел од телото бил прегледан.
Скенирањето е дел од неговиот „полугодишен лекарски преглед“, кој следува по првиот преглед оваа година во април. Во извештајот на Белата куќа се наведува дека прегледот вклучувал „напредно снимање, лабораториски тестови и превентивни здравствени проценки“, но резултатите од МРИ-то не беа објавени, оставајќи еден клучен детал во сенка.
