Јужнокорејската Национална разузнавачка служба (НИС) објави шокантни податоци – околу 2.000 севернокорејски војници, испратени во Русија да се борат на украинскиот фронт, веќе го загубиле животот. Информацијата ја потврдија јужнокорејските пратеници Парк Сун-вон и Ли Сеонг-квен, пренесува новинската агенција „Џонхап“.
Пјонгјанг, и покрај високите загуби, планира да испрати дополнителни 6.000 војници во Русија, како дел од нова, трета етапа на распоредување. Во исто време, околу 1.000 борбени инженери веќе пристигнале и се интегрирани во руските сили.
Извештаите наведуваат дека севернокорејските трупи се стационирани во заднината на фронтот како резервна сила, што може да значи дека командната структура е под притисок и дека се вршат промени во раководството меѓу испратените единици.
Ли Сеонг-квен изјави дека Северна Кореја во првите два бранови на распоредување признала околу 350 жртви, но податоците на НИС укажуваат на значително поголеми бројки – најмалку 600 загинати само до април годинава.
Од октомври 2023 година, Пјонгјанг испратил околу 13.000 војници заедно со воена опрема и оружје, во знак на поддршка на руските воени операции против Украина.
Овие откритија отвораат ново прашање за обемот и цената на воената соработка меѓу Москва и Пјонгјанг, особено во време кога Северна Кореја се соочува со економски и хуманитарни тешкотии дома.
