Италијанската полиција уапси општ лекар од покраината Тренто, кој е под сериозно сомнение дека извршил десетици незаконски операции на обрежување врз момчиња од странско потекло во својата приватна ординација.
Истражителите утврдиле дека лекарот немал лиценца за работа, а неговата ординација била во крајно нехигиенски и несоодветни услови. Најшокантно од сè е што му помагале неговите двајца синови, иако немале никакви медицински квалификации.
Според полициските наоди, најмалку 40 деца поминале низ оваа ординација во текот на 2022 година, а меѓу нив имало и деца кои дошле од други региони на Италија. Неколку од нив барале итна медицинска помош поради компликации, а едно дете завршило во болница по труење со бензодиазепини, кои докторот му ги дал во прекумерна доза за да го смири пред операцијата.
За време на претресот, карабињерите пронашле маса за преглед со ремени за врзување, електричен скалпел, пакувања со бензодиазепини и локален анестетик, како и визит-картички со ознака „обрежување“ и блокови со сметки за медицински услуги.
Обвинителството во Тренто издаде налог за домашен притвор за докторот, а неговата ординација е затворена со превентивна мерка. Едниот од неговите синови, кој е полнолетен, е пријавен во обвинителството.
Мајорот Федерико Силвестри, командант на специјалниот одред на НАС во Трентино, изјави дека родителите на децата биле измамени и не знаеле дека ординацијата е неовластена.
„Секогаш проверувајте дали персоналот и практиките се регистрирани и имаат лиценца, бидејќи здравјето на децата мора да биде апсолутен приоритет,“ предупреди Силвестри.
Целиот случај предизвика огромен шок во италијанската јавност, а истрагата продолжува за да се откријат сите можни жртви на овој незаконски и опасен медицински третман.
