Американскиот претседател Доналд Трамп излезе со серија остри пораки кон Иран, предупредувајќи дека САД ќе интервенираат со многу поголема сила доколку Техеран се обиде да го наруши протокот на нафта од регионот.
На прес-конференција во Флорида, Трамп истакна дека Вашингтон нема да дозволи „терористички режим“ да ја загрозува глобалната енергетска безбедност или да ја држи светската економија под притисок преку евентуална блокада на снабдувањето со нафта. Тој нагласи дека евентуална ескалација ќе има сериозни последици и дека Иран мора внимателно да размисли пред да преземе какви било чекори.
И покрај овие остри предупредувања, претседателот ја минимизираше тежината на конфликтот, нарекувајќи ја можната војна со Иран „кратко патување“ и „мала екскурзија“ во обраќањето пред републикански конгресмени. Сепак, тој испрати поостри сигнали дека операцијата ќе продолжи додека противникот не биде целосно поразен.
Трамп откри дека американската армија веќе започнала напади врз иранските капацитети за производство на беспилотни летала, тврдејќи дека уништувањето на клучните цели се одвива побрзо од планираното. Според него, кампањата се приближува кон завршна фаза, а конфликтот ќе се смета за завршен дури кога Иран ќе биде лишен од можноста да развива оружје кое би претставувало закана за САД, Израел или нивните сојузници на подолг рок.
