Скандалот околу врските со злогласниот американски милијардер и сексуален престапник Џефри Епстин силно ја потресе Норвешка и доведе до отворање сериозни истраги против поранешни државни функционери од највисок ранг.
Норвешката полиција за економски криминал покрена постапки против поранешниот премиер и министер за надворешни работи Торбјерн Јагланд, како и против поранешната амбасадорка во Јордан и Ирак Мона Јуул. Во фокусот на истрагата е и нејзиниот сопруг, поранешниот министер Терје Ред-Ларсен, осомничен за соучесништво.
Паралелно со полициските дејства, норвешкиот парламент одобри ретка надворешна истрага за врските на Министерството за надворешни работи со Епстин — потег што покажува колку сериозно државата го сфаќа скандалот.
Сè започна по објавувањето на нови американски документи кои откриваат дека Епстин со години одржувал контакти со политички елити, членови на кралски семејства и моќни бизнисмени ширум Европа.
Истражителите сомневаат дека дел од односите со норвешките функционери можеби вклучувале коруптивни услуги, финансиски поволности и посредувања на високо дипломатско ниво.
Мејлови од 2014 година покажуваат дека Јагланд планирал семејна посета кај Епстин во Палм Бич и на неговиот приватен карипски остров, иако поранешниот премиер тврди дека никогаш не бил таму. Подоцнежна преписка укажува и на барања за финансиска помош за стан во Осло, како и обиди Епстин преку Јагланд да воспостави контакти со рускиот врв.
Во меѓувреме, Јуул и Ред-Ларсен исто така планирале семејна посета на островот, а документи покажуваат дека Епстин им помагал при купување недвижности. Во неговиот тестамент, потпишан непосредно пред смртта во затвор во 2019 година, тој им оставил по пет милиони долари на нивните деца.
Скандалот доби уште пошироки размери откако норвешката престолонаследничка принцеза Мете-Марит јавно се извини за своето пријателство со Епстин, кое траело со години по неговата осуда за сексуални злосторства.
Политичарите во Осло предупредуваат дека доколку дури и дел од објавените информации се покажат како точни, станува збор за еден од најтешките морални и институционални потреси во поновата историја на земјата.
Истрагите се во тек, а јавноста во Норвешка со неверување ги следи откритијата што секојдневно излегуваат на површина.
