Светот е во состојба на зголемена будност по веста дека Полска за влакно избегнала катастрофален сајбер напад насочен директно кон нејзиниот Национален центар за нуклеарни истражувања. Полската влада потврди дека хакери се обиделе да ја пробијат безбедносната бариера на објектот каде се вршат критични истражувања во областа на нуклеарната енергија и субатомската физика.
Министерот за дигитални работи, Кшиштоф Гавковски, откри дека „дигиталната опсада“ се случила во изминатите неколку дена. Иако нападот бил навремено сопрен пред да предизвика хаос, она што ги загрижува службите е потеклото на хакерите. Првичните дигитални отпечатоци и „влезни точки“ водат директно кон Иран, но полските власти се исклучително претпазливи. Постои сериозен сомнеж дека трагите кон Техеран се всушност вешто подметната стапица за да се скрие вистинскиот иницијатор на нападот.
Од почетокот на војната во Украина, Полска е под постојан удар на сајбер пирати, при што најчесто прстот се вперува кон Москва, која пак упорно негира каква било вмешаност. Додека иранската амбасада молчи, полските специјални единици вршат длабинска форензика на системите за да утврдат дали зад овој обид стои државна структура или моќна хакерска група со скриена агенда. Центарот моментално е под максимално обезбедување, додека Полска продолжува со своите амбициозни планови за изградба на првата нуклеарна централа во земјата.
