Францускиот Национален собир го поддржа законот кој им забранува на децата под 15 години да користат социјални медиуми, како што се Facebook, TikTok, Snapchat и YouTube. Целта е да се намали онлајн насилството и да се заштити менталното здравје на младите. Законот сега треба да го разгледа Сенатот, а потоа повторно да се гласа во Националното собрание.
Претседателот Емануел Макрон ја поврзува експанзијата на социјалните медиуми со насилството и психолошките проблеми кај младите и инсистира забраната да стапи на сила пред почетокот на новата учебна година во септември. Тој ја следи стратегијата на Австралија, која од декември минатата година им забрани на малолетници под 16 години пристап до социјалните платформи.
„Со овој закон поставуваме јасни граници и испраќаме порака дека социјалните медиуми не се безопасни“, изјави пратеничката Лора Милер, додавајќи дека децата читаат помалку, спијат помалку и постојано се споредуваат со другите. Поддршка за забраната доаѓа и од јавноста – анкета од „Харис Интерактив“ покажува дека 73% од Французите ја поддржуваат мерката.
Сепак, спроведувањето на забраната нема да биде лесно. Во Австралија младите веќе наоѓаат начини да ја заобиколат возрастната верификација, а во Франција се планира блокирање преку слични механизми.
Други европски земји, вклучувајќи го Обединетото Кралство, Данска, Шпанија и Грција, ја разгледуваат можноста за слични ограничувања, а Европскиот парламент веќе повика на минимална возраст за користење на социјалните медиуми.
Франција со ова ја засилува контролата врз дигиталното здравје на младите, отворајќи прашања за рамнотежа меѓу слободата на изразување и безбедноста на децата.
