Железничкиот сообраќај во Србија денеска е целосно во прекин, откако во 10:18 часот компанијата „Србијавоз“ добила анонимна дојава за поставени експлозивни направи во сите патнички возови што се во функција низ земјата.
Според официјалното соопштение на компанијата, веднаш по приемот на дојавата, сообраќајот на сите патнички линии бил итно запрен, додека надлежните државни служби – антитерористички тимови, полиција и специјалци – ги започнале безбедносните проверки во секој поединечен воз.
„Приоритет број еден е безбедноста на патниците и вработените“, се вели во соопштението. Иако засега нема потврдена информација за реална закана, мерките на претпазливост се на највисоко ниво.
Патниците кои се затекнале на железничките станици или веќе биле во возовите се евакуирани, а некои од нив изјавиле дека ситуацијата предизвикала голема вознемиреност, особено кај постарите и децата.
„Србијавоз“ ги повика сите патници да ги следат официјалните канали за информации, со цел да бидат навремено известени за нормализирање на сообраќајот и можните нови термини на тргнување.
Во меѓувреме, истрагата е во тек. Се проверува дали станува збор за координиран лажен аларм или реална терористичка закана.
