Во насока на подобрување на женското здравје, Општина Карпош во соработка со ординацијата по гинекологија и акушерство ПЗУ „Св. Алексеј“ - Скопје, од среда, 1 април 2026 година, ќе организира бесплатни ехографски прегледи на дојки за жени до 45 годишна возраст.
Проектот е финансиски поддржан од локалната самоуправа и се реализира преку Програмата за еднакви можности меѓу жените и мажите за 2026 година. Целта е да се подигне свеста за женското здравје преку бесплатни превентивни прегледи, кои ќе се одржуваат во ПЗУ „Св. Алексеј“, дел од ЈЗУ Поликлиника Букурешт.
Заинтересираните жени можат да закажат преглед и да добијат повеќе информации од денеска, 25 март 2026 година, на телефонскиот број 071 243 400.
ПЗУ „Св. Алексеј“ на пациентките кои ќе направат бесплатен ехографски преглед на дојки ќе им понуди и 15% попуст за комплетен гинеколошки преглед.
Проектот се фокусира на едукација за здравјето на дојките, рано откривање на болести како рак на дојка и промоција на здравствени мерки.
Од Општината посочуваат дека со овие активности се зајакнува заедницата преку стручна едукација и се поттикнува свесност за женското здравје.
