Ново истражување открива дека само една чаша млеко на ден би можела значително да го намали ризикот од рак на дебелото црево.
Набљудувачка студија спроведена на повеќе од половина милион жени покажала дека консумирање околу 200 грама млеко дневно го намалува ризикот од рак до 14%. Уште повпечатливо – внесот на 300 милиграми калциум дневно е поврзан со 17% помал ризик од појава на болеста.
Истражувачите од Универзитетот во Оксфорд заклучуваат дека токму калциумот е главниот фактор кој обезбедува заштита на здравјето на цревата. Тоа значи дека и друга храна богата со калциум – како соја или растителни замени за млеко – може да има сличен ефект.
Но, експертите предупредуваат дека резултатите мора да се читаат со резерва. Според Дејвид Нунан, кој се занимава со медицина базирана на докази, бројките можат да бидат преувеличени поради методолошки ограничувања и затоа се потребни поцврсти истражувања за да се потврди причинско-последичната врска.
Она што е сигурно е дека нездравата исхрана, особено прекумерната консумација на алкохол и процесирано месо, го зголемува ризикот од рак на дебелото црево – па балансираната исхрана со повеќе калциум може да биде еден од начините за превенција.
