Замастениот црн дроб е сè почест здравствен проблем, а експертите предупредуваат дека правилната исхрана е еден од најважните чекори за подобрување на состојбата. Според хепатолозите, не постои само една „забранета“ намирница, туку цела група храна што може дополнително да го оптовари црниот дроб.
На врвот на листата се едноставните шеќери и рафинираните јаглехидрати. Тоа вклучува газирани и засладени пијалаци, индустриски сокови, слатки, колачи, чипс, грицки, бел леб, бел ориз и производи од бело брашно. Ваквата храна го нарушува метаболизмот и придонесува за натрупување масти во црниот дроб.
Наместо тоа, лекарите препорачуваат медитерански начин на исхрана, богат со зеленчук, овошје, мешунки, интегрални житарки, риба, здрави масти и растителни протеини. Доколку е потребно слабеење, може да се намали внесот на јаглехидрати и да се зголеми внесот на протеини, а редовната физичка активност е исто така важен дел од третманот.
Специјалистите потсетуваат дека иако алкохолот е добро познат фактор на ризик, кај многу луѓе замастениот црн дроб е поврзан со прекумерна телесна тежина, покачен шеќер во крвта, висок крвен притисок и покачени триглицериди. Затоа, целта не е само исфрлање на една намирница, туку подобрување на целокупното метаболичко здравје.
