Apple се подготвува да ја претстави серијата iPhone 17, а според она што досега протече, нас не нѐ очекува само надградба туку и сериозен пресврт во дизајнот. Според гласините, iPhone 17 Pro ќе добие целосно нов изглед на камерата – нешто што не се сменило уште од времето на iPhone X.
Фотографии што кружат на платформата X (поранешен Twitter) прикажуваат уред кој се претпоставува дека е прототип на iPhone 17 Pro. На сликите се гледа преместување на LiDAR сензорот и блицот, што се совпаѓа со постојните шпекулации. Интересно е тоа што фотографиите се направени токму во Калифорнија, во близина на централата на Apple, што ѝ дава тежина на можноста дека навистина гледаме дел од иднината на смартфоните.
iPhone 17 Pro и 17 Pro Max наводно ќе имаат модул на камерата што ќе зафаќа поголем дел од горната десна страна на задниот дел, а Apple планира да воведе нови, попривлечни материјали и бои. Меѓу нив доминира нова портокалова нијанса која треба да го издвојува телефонот од конкуренцијата.
Претставувањето е сѐ поблиску, а прашањето останува: дали фановите ќе го прифатат овој визуелен пресврт или ќе останат носталгични за досегашниот препознатлив стил на iPhone?
