Вистинска драма се одвивала викендов на пешачката патека кај Студенчишта во Охрид, каде што параглајдер заврши среде шеталиште полно со луѓе, создавајќи сцени кои лесно можеле да прераснат во сериозна несреќа.
Според видеото објавено на Јутјуб каналот на Ohrid1.com, леталото се движело невообичаено ниско над патеката, приближувајќи се опасно блиску до пешаците. Во еден момент, жена и мало девојче забележуваат што се случува и видно исплашени се тргаат настрана, избегнувајќи директен контакт.
Ситуацијата дополнително ескалира кога параглајдерот удира во улична светилка, која од силата на ударот се урива. Само неколку моменти подоцна, леталото паѓа на земја, при што лицата кои биле во него завршуваат на само метар или два од повозрасен пар кој мирно шетал по патеката.
Иако сцената изгледала драматично и опасно, вистинска среќа е што никој не бил повреден. Инцидентот, според информациите, се случил за време на комерцијален лет со туристи, што дополнително го отвора прашањето за безбедноста и контролата при вакви активности.
Настанот предизвика бројни реакции на социјалните мрежи, каде граѓаните изразуваат загриженост за ваквиот тип на авантуристички летови во близина на фреквентни пешачки зони. Дел од локалното население смета дека е неопходно да се воведат построги правила, како и да се размисли за промена на локациите за слетување, со цел да се избегнат потенцијално опасни ситуации во иднина.
Иако овојпат сè заврши без последици, настанот јасно укажува колку брзо една рекреативна активност може да се претвори во ризик кога безбедносните услови не се на соодветно ниво.
