Голем метеж и револт се создаде утрово во Клиничкиот центар „Мајка Тереза“ во Скопје, каде што повторно дојде до целосен колапс на системот „Мој термин“, што резултираше со десетици пациенти кои не добија никаква медицинска услуга. Проблемот ги погоди најмногу ранливите категории — трудници, пациенти кои доаѓаат за крвна слика на празен стомак, како и лица со однапред закажани термини кои останаа неискористени.
Според сведочењата на пациенти, дел од нив биле принудени со часови да чекаат без никаква информација, додека други, разочарани и исцрпени, биле вратени дома.
„Чекав цел ден. Имав број 91, стигнаа до број 30 кога престанаа да работат. Сите се напикаа на шалтериве за да прашуваат, јас се откажав и си заминав“, вели еден револтиран пациент за „Слободен печат“.
Од системот „Мој термин“ признаваат дека денешниот ден минува со значително забавена функционалност, но потенцираат дека претходните денови сѐ било во ред.
Директорот на системот, Фикрет Шабани, објасни дека секој почеток на месец е критичен поради енормниот внес на нови податоци, што го преоптоварува системот.
„Чекаме одговор од ИТ техничарите од ФИНКИ за да утврдиме дали станува збор за инцидент или хардверски проблем. Системот е стар речиси 10 години. Секоја година се внесуваат од 20 до 40 милиони рецепти и околу 12 милиони упати. Инфраструктурата е застарена, но за еден до два месеца целиот систем ќе се префрли во новиот дата-центар, што ќе донесе значајни хардверски и софтверски подобрувања“, изјави Шабани.
Иако институциите уверуваат дека наскоро ќе дојде до технолошко освежување на системот, реалноста на теренот говори сосема друго: пациентите и понатаму се оставени на милост и немилост на нефункционален систем, принудени да се соочуваат со долги редици, неизвесност и губење на време — и сето тоа, за основна здравствена услуга.
