На претстојните локални избори во Македонија, граѓаните ќе гласаат за осми пат од независноста на државата. Интересен податок од Прирачникот за локалните избори 2025 година, издаден од Институтот за демократија, солидарност и цивилно општество и Фондацијата Конрад Аденауер, е дека во трката учествуваат дури седум кандидати кои се постари од 90 години.
Станува збор за кандидати за советници застапени на листите на различни политички партии и групи избирачи во општините низ земјата:
- Најстара е 97-годишната Цветанка Велјанова (МААК, кандидат за советник во Општина Битола)
- 93-годишната Радмила Јанушевска (МААК, кандидат за советник во Општина Велес)
- 92-годишниот Томислав Маниќ (Група избирачи Горан Ѓуровски, кандидат за советник во Општина Центар)
- 92-годишната Љубица Олумчева (Твоја партија, кандидат за советник во Град Скопје)
- 91-годишната Драгица Стојановска (МААК, кандидат за советник во Општина Кисела Вода)
- 91-годишната Стојанка Тортевска (Твоја партија, кандидат за советник во Град Скопје)
- 90-годишниот Трајан Ѓорчевски (Единствена Македонија, кандидат за советник во Град Скопје)
Покрај овие постари кандидати за советници, највозрасната кандидатка за градоначалник е Марија Мајкиќ (79 години, Единствена Македонија, Општина Гази Баба), додека најмладиот кандидат за градоначалник е Андреј Димитриевски од Левица (23 години, Општина Старо Нагоричане).
Вкупно на изборите учествуваат 312 кандидати за градоначалници и 575 кандидатски листи за советници. Најголем број градоначалници се во зрели години, помеѓу 40 и 50 години. За споредба, на локалните избори во 2021 година, најстариот кандидат имаше 89 години.
Овие податоци ја илустрираат разновидноста на возрастите на кандидатите и покажуваат дека на овие избори учествуваат кандидати од сите генерации, од младите до оние со повеќе од девет децении животно искуство.
