По стабилниот и топол период, временската состојба во Македонија повторно ќе стане нестабилна. Метеорологот Славчо Попоски објави мапа и предупреди дека во следните денови постојат услови за развој на локални грмотевични невремиња на повеќе места во земјава.
Причината за промената на времето е продор на атмосферски фронт од север, кој носи поладен воздух на височина. Поради оваа атмосферска поставеност, денес, среда (2 септември), во попладневните и вечерните часови, како и во текот на ноќта кон четврток, се очекува развој на конвективна облачност и грмотевични јадра.
Нестабилноста ќе продолжи и утре, четврток (3 септември), кога на повеќе места повторно ќе има услови за појава на пороен дожд, грмежи и засилен ветер.
Според Попоски, атмосферата во овој период ќе располага со значителна енергија, поради што локално временските процеси може да бидат и поинтензивни. Тоа значи дека на одредени подрачја невремето може да биде проследено со обилен и краткотраен пороен дожд, силни налети на ветер, чести електрични празнења, а постојат и услови за појава на град.
Особено внимание се посочува за Скопскиот регион и Скопската Котлина. Во овој дел од земјата, во споменатиот период, локално исто така постои можност за развој на невреме. Доколку се формираат поинтензивни грмотевични јадра, можно е да има обилен пороен дожд, силен ветер и силни електрични празнења, како и услови за појава на град.
Токму поради можноста за вакви атмосферски процеси, Попоски упатува апел до граѓаните да бидат повнимателни доколку временските услови нагло се влошат. При појава на силни електрични празнења, се препорачува да се избегнува престој на отворен простор, а особено да не се стои под осамени дрвја.
Во меѓувреме, температурите и понатаму ќе останат релативно високи, иако во четврток се очекува нивно благо намалување.
Денес, среда (2 септември), максималните температури во Македонија ќе се движат од 29 до 37 степени. Во Скопје и околината се очекува максималната температура да достигне околу 35 степени.
Утре, четврток (3 септември), температурите ќе бидат нешто пониски. Максималните вредности во земјава ќе се движат во интервал од 27 до 34 степени, додека во Скопје и околината температурата ќе достигне околу 34 степени.
Така, и покрај високите температури, временската слика во следните часови и во текот на утрешниот ден ќе биде многу понестабилна. На одредени места промената може да биде нагла, со развој на облачност и локални грмотевични процеси, поради што граѓаните треба да ја следат состојбата и да бидат внимателни доколку започне невреме.
