Двајца битолчани се приведени откако полицијата во нивното возило пронајде две илегално уловени срни.
Инцидентот се случил вчера околу 10:30 часот на крстосницата за село Брод, општина Новаци. Полицајците од Полициската станица за гранични проверки и граничен надзор Меџитлија ги лишиле од слобода С.Ф. (51) и В.Ф. (26), двајцата од Битола.
При преглед на автомобилот „Форд“ со битолски регистарски ознаки, во кој С.Ф. бил возач, а В.Ф. сопатник, биле пронајдени еден карабин, две ловечки пушки со дозволи, неколку уловени пајки (со дозвола за лов), како и две уловени срни за кои немале дозвола.
Против двајцата ќе биде поднесена соодветна пријава по целосно документирање на случајот.
