Градскиот базен во Кавадарци наскоро ќе ги отвори вратите за посетителите во целосно ново, непрепознатливо издание. Градоначалникот Митко Јанчев, заедно со претседателот на Советот на Општина Кавадарци, д-р Стојанчо Рамов, и стручните служби од Локалната самоуправа, денеска извршија увид во градежните активности кои веќе се наоѓаат во својата завршна фаза.
По комплетната и темелна реконструкција, овој забавен комплекс е дизајниран да понуди содржини за сите генерации.
Што носи новиот проект?
- Комплетна модернизација: Целосно обновен лик и инфраструктура според највисоки стандарди.
- Забавен воден парк: Нови водени атракции прилагодени за забава на младите.
- Зона за релаксација: Пријатен амбиент и катчиња за одмор на постарите сограѓани.
„Со оваа комплетна реконструкција, Градскиот Базен Кавадарци не само што го менува својот изглед, туку прераснува во модерен забавен воден парк. Ова ќе биде главното место за освежување, дружење и рекреација за сите наши граѓани во текот на топлите летни денови“, истакнаа од Локалната самоуправа.
Општина Кавадарци уште веднш докажува дека инвестирањето во капитални објекти за спорт и рекреација останува високо на листата на приоритети за подобрување на квалитетот на живот во градот. Комплексот се очекува наскоро и официјално да биде пуштен во употреба.
