На денешното судско рочиште за трагичниот пожар во дискотеката „Пулс“ во Кочани, сведокот Горан Игновски, продавач на опрема за концерти, објасни дека пред две и пол години на групата „ДНК“ им продал осум топли прскалки за сценски ефекти, но дека тие биле со дострел до два метра. Спротивно на тоа, прскалките кои ја предизвикаа трагедијата во дискотеката имале дострел до три метри и го запалиле сунѓерестиот плафон.
Обвинителот Дарко Јакимовски истакна дека 63-те жртви не загинале поради прскалките сами по себе, туку затоа што дискотеката имала само една врата, што им го попречило бегството. „Да имале каде да излезат, немаше да умрат“, рече Јакимовски.
Сведокот Игновски појасни дека неговата работа се однесува на продажба на сцена опрема: осветлување, ладни и топли фонтани, чад-машини и слично. Тој посочи дека топлите прскалки кои ги продавал се мали куферчиња со барут, магнезиум и алуминиум, активирани со далечински управувач. Тие се наменети за внатрешна употреба, со дострел до два метра, и не се исти како прскалките кои ја предизвикаа трагедијата.
Игновски објасни дека тие прскалки што ги продал на групата „ДНК“ се користеле пред повеќе од три години и дека се потрошени многу пред пожарот во март 2025 година. Тој додаде дека топлите прскалки со дострел до три метри можат да се најдат и на Бит Пазар и биле користени од други групи, како во клубот „Де факто“ во Гевгелија, каде имало помали пожари, но без трагични последици.
Сведокот детално го опиша и далечинското активирање на прскалките, кое функционира како зип-запалка со антенче.
Рочиштето продолжува со други сведоци, додека обвинителството ги разгледува активното и пасивното учество на сите вклучени страни во трагедијата.
