Во Скопје се става крај на посебните услови за паркирање – сите корисници ќе плаќаат иста цена, без исклучоци. Градоначалникот Орце Ѓорѓиевски порача дека нема да има зголемување на цените, но ќе има строга еднаквост и ред.
На денешната прес-конференција, тој реагираше на прашањата околу повластениот паркинг што досега го користеле одредени институции и дел од вработените во Градот. Според него, ваквата практика завршува веднаш.
Ѓорѓиевски нагласи дека сите вработени во градската администрација се граѓани како и сите други и нема основ тие да плаќаат помалку за паркирање. Како што истакна, секој што користи паркинг-услуги ќе ја плаќа истата, однапред утврдена цена.
Тој посочи дека досегашната состојба била неправедна, бидејќи едни плаќале симболични суми, додека други биле приморани да издвојуваат и повеќе од тројно повисок износ за месечна карта. Таквата нерамноправност, според него, повеќе нема да се толерира.
„Ова не е поскапување, туку воведување ред“, потенцираше градоначалникот, додавајќи дека системот мора да биде јасен и еднаков за сите.
Покрај тоа, најавено е и проширување на зонското паркирање на нови локации низ главниот град. Целта, како што беше истакнато, е подобра контрола на сообраќајот, поголема достапност на паркинг-места и поефикасно управување со јавниот простор.
