Инвестиција од 12 милиони евра и поддршка за Тиквешијата: Општина Кавадарци и Владата гарантираат откуп и обесштетување за лозарите!

Градоначалникот на Кавадарци, Митко Јанчев, заедно со министерот за земјоделство, Борче Серафимовски, извршија обиколка на откупните пунктови и винариите каде што интензивно се одвива откупот на овогодишната реколта на сортите „Вранец“ и „Смедеревка“. Во рамки на посетата беа обиколени винариите „Тиквеш“, „Мовино“ и „Бруно“, како и откупниот пункт „Југокомерц“ за Охрид.

Посетата е дел од активностите што градоначалникот Јанчев и министерот Серафимовски ги спроведуваат во изминатите дваесетина дена за следење на состојбата на терен. Во координација со премиерот Христијан Мицкоски и по одржаните состаноци на кои беа презентирани барањата на секторот, обезбедена е директна финансиска поддршка за стабилизирање на пазарот.

Поддршка за винариите и сигурност за лозарите

Преку Развојната банка на Македонија се обезбедени 12 милиони евра наменети за зголемување на ликвидноста на винариите и откупните пунктови. Овие средства се доделуваат под исклучително поволни услови, со цел да се обезбеди навремена исплата на лозарите и преземање на целокупниот род.

Проценка и обесштетување на штетите од невремето

Паралелно со откупот, Општина Кавадарци презема мерки за санирање на последиците од соопштеното невреме и градот што ги погоди лозовите насади во Тиквешијата:

• Проценка на терен: Објавен е јавен повик и формирани се две комисии кои вршат проценка на штетите. Изработениот елаборат ќе биде доставен до Владината комисија за проценка на штети од елементарни непогоди за обесштетување на земјоделците.
• Повик по 1 октомври: По завршување на реколтата, ќе се отвори нов повик за евидентирање на сите површини со останато необрано или неоткупено грозје поради природни непогоди или сушење, со цел изнаоѓање соодветен механизам за нивна надомест.

Стратешки планови за 2027 година и проект за дестилерија

По налог на премиерот Мицкоски, од ноември започнуваат подготовките за поддршка на реколтата во 2027 година. Фокусот ќе биде ставен врз намалување на залихите на вино, поддршка на извозот и отворање нови пазари.

Клучен чекор во долгорочната стратегија е реализацијата на проектот за дестилерија. Оваа иницијатива ќе овозможи преработка на вишокот вино во дестилат, со што ќе се ослободат капацитетите во цистерните на винариите пред секоја нова берба и ќе се гарантира пласманот за лозарите во иднина.