Температурите во Скопје достигнуваат до 42°C, а граѓаните очајно бараат начин да се разладат, барем за неколку часа. Иако скопскиот аквапарк кај „Јане Сандански“ останува затворен и ова лето, алтернатива се базените ширум градот – но и таму не е евтино.
Цените варираат: влезниците за обичните базени се движат од 300 до 400 денари, додека за пософистицираните и луксузни комплекси околу Скопје, цената може да достигне и до 1.200 денари – само за влез, без пијалак или храна.
Петровец, Кучково, Катланово, Трубарево, Драчево – овие дестинации нудат базени во рамки на хотели, ресторани и вили, со чиста вода, високо ниво на услуга и организирани забави. Сепак, луксузот доаѓа со цена. Многу посетители реагираат дека за едно просечно семејство, еден ден на базен може да чини над 3.000 денари, ако се пресмета и храна и пијалок, кои на овие локации се по правило поскапи.
„Сѐ е совршено – вода, услуга, атмосфера. Но цената за влез од 1.200 денари е навистина висока ако не добиваш ништо друго освен базен“, вели една скопјанка, редовен посетител на ваквите комплекси.
Некои од овие базени нудат тематски забави, пена парти и настапи од познати диџеи, со што се оправдува дел од цената, но за голем дел од населението, летното освежување полека станува луксуз кој не секој може да си го дозволи.
