Државната изборна комисија (ДИК) донесе одлука сите избирачки одбори вечерва, по завршувањето на гласањето, да бидат присутни во полн состав при броењето на гласовите. Тоа значи дека петте членови и нивните пет заменици мора да учествуваат во процесот на броење по 19 часот.
Како што изјави претседателот на ДИК, Борис Кондарко, оваа мерка е воведена со цел да се зголеми транспарентноста и ефикасноста на избирачките одбори, како и да се забрза составувањето на записниците и објавувањето на изборните резултати.
„Одлуката е донесена за да се овозможи поголема контрола и брзина во постапката на броење. Присуството на сите членови ќе придонесе за поголема доверба во процесот“, рече Кондарко.
Тој посочи дека ова е особено значајно за Градот Скопје, каде што гласачите во десетте општини добиваат по четири ливчиња, што го отежнува и забавува процесот на броење. Во останатите општини се гласа на две ливчиња — за градоначалник и за советници.
Кондарко додаде дека поради сложеноста на локалните избори, резултатите секогаш пристигнуваат нешто побавно, но со оваа нова мерка ДИК очекува процесот да биде поефикасен и потранспарентен.
