Државниот инспекторат за земјоделство од почетокот на 2026 година до 15 септември спровел вкупно 873 вонредни инспекциски надзори кај регистрирани правни лица кои вршат откуп на земјоделски производи.
Директорот на Инспекторатот, Ивица Ангеловски, информираше дека при контролите биле утврдени повеќе неправилности, поради што инспекторите изрекле вкупно 30 мерки и издале 17 платни налози.
Мерките опфаќале забрани, опомени, наредби и задолженија. Од 17-те издадени платни налози, три биле платени, додека за останатите се водат прекршочни постапки пред Прекршочната комисија во Министерството.
Меѓу најчесто утврдените неправилности биле откуп на земјоделски производи без претходно склучени договори со производителите, неисплатени обврски, непочитување на роковите за исплата и неистакнати ценовници.
Инспекторите утврдиле и случаи на непоседување верификувани мерни инструменти, како и вршење откуп без соодветен упис во Регистарот на откупувачи.
Ангеловски посочи дека Инспекторатот има улога и во процедурите поврзани со извозот на земјоделски производи. Преку сертификација и издавање фитосанитарни сертификати се потврдува исполнувањето на фитосанитарните услови за производите што се извезуваат или реекспортираат.
Од Инспекторатот најавуваат дека контролите кај откупувачите ќе продолжат и во наредниот период, а целта, како што посочуваат, е заштита на правата и интересите на земјоделските производители и преземање законски мерки при секоја утврдена неправилност.
