Иако многу здравствени проблеми се поврзуваат со начинот на живот или со околината, медицинските експерти предупредуваат дека генетиката има големо влијание врз ризикот од развој на одредени болести. Доколку во семејството веќе постои историја на одредени здравствени состојби, шансите тие да се појават и кај следните генерации може да бидат значително поголеми.
Според докторката Клер Грејнџер, постојат неколку чести состојби кај кои наследниот фактор игра важна улога.
Една од нив е дијабетесот, особено дијабетес тип 2. За разлика од тип 1, кој се смета за автоимуна болест, тип 2 најчесто е комбинација од генетски фактори и животни навики. Иако исхраната, физичката активност и телесната тежина се важни за појавата на оваа болест, наследноста може значително да го зголеми ризикот. Затоа лекарите советуваат редовни здравствени контроли, одржување на здрава тежина и внимание на симптоми како прекумерна жед, замор и често мокрење.
Втората состојба која често се појавува во семејствата е астмата. Станува збор за заболување на дишните патишта кое може да предизвика кашлица, чувство на стегање во градите и отежнато дишење. Истражувањата покажуваат дека децата имаат значително поголем ризик да развијат астма доколку едниот или двата родители ја имаат оваа болест. Дополнително, наследноста може да влијае и на појавата на други алергиски состојби како поленска треска или егзема.
Третата состојба за која често се потценува генетското влијание се акните. Иако најчесто се поврзуваат со пубертетот, кај многу луѓе тие продолжуваат и во зрелата возраст. Според експертите, генетиката може да влијае на тоа колку себум произведува кожата, како реагира на бактерии и колку силно се развива воспалението. Затоа, доколку родителите имале изразени или долготрајни проблеми со акни, постои поголема веројатност истото да се појави и кај нивните деца.
Иако генетиката може да го зголеми ризикот, лекарите нагласуваат дека со правилен начин на живот, рана дијагноза и соодветен третман, многу од овие состојби може успешно да се контролираат.
