Во 2020 година, животот на Бруклин Кури се менува засекогаш – куче на блиска роднина ја нападнало и ѝ ја одгризало горната усна и дел од носот. Но наместо да се повлече во тишина, таа реши да го претвори својот болен пат во јавна борба и надеж за сите кои минуваат низ слични трауми.
Во следните неколку години, Бруклин мина низ пет големи реконструктивни операции, од кои секоја беше чекор кон враќање на физичкиот, но и емотивниот интегритет. Секоја фаза – од шевовите до болката – ја документираше на Инстаграм, покажувајќи храброст и транспарентност што ретко се гледаат.
Првата интервенција била реконструкција на горната усна со кожа земена од нејзината подлактица – дел кој е најблизок по текстура со усните. Иако изгледот првично ја шокирал, таа без срам го споделила резултатот за да охрабри и други да се прифатат себеси и да не се срамат од своите лузни.
Во втората операција, докторите работеле на отварање на левата ноздра за да ѝ го подобрат дишењето. Бруклин отворено зборуваше за стравовите – не од болка, туку од тоа дека можеби ќе се соочи со уште една промена на нејзиниот изглед. Но, повторно ја победи несигурноста.
Третата интервенција – ринопластика – го врати нејзиниот нос во природна форма. Таа не ја криеше радоста кога за првпат повторно го виде своето лице во огледало и со искрена насмевка објави: „Гледајте ми го носот!“.
Во следните две операции, докторите ја обликуваа и финализираа горната усна, а Бруклин доби нешто повеќе од нов изглед – доби самодоверба, нова насмевка и инспиративна мисија.
Иако сè уште не ја направила планираната тетоважа на усната, таа продолжува да споделува секојдневни моменти, совети и охрабрувања за своите следбеници.
Бруклин Кури денес не е само преживеана – таа е симбол на сила, решителност и љубов кон себеси, без филтри и без страв од осуда. Нејзината приказна е потсетник дека од најтешките удари понекогаш се раѓаат најсилните луѓе.
