Томас Маркл изрази разочарување по повод најновата серија на Нетфликс за неговата ќерка, Меган, „Со љубов, Меган“. Во интервју за „Мејл“, Томас ја обвини Меган дека лаже пред камерите и дека се труди премногу да го зачува својот имиџ во јавноста.
Коментарите на Томас доаѓаат по изјавата на Меган во емисијата кај Минди Калинг: „И толку е смешно што постојано велиш Меган Маркл. Знаеш дека сега сум од Сасекс.“
Главната причина за тензијата помеѓу таткото и ќерката е нејзината одлука да се дистанцира од презимето Маркл. Според Томас, оваа одлука длабоко би ја разочарала покојната баба на Меган, која многу ја сакала.
„Мајка ми беше горда што беше Маркл. И јас сум. Баба ѝ се превртува во гробот. Меган немаше проблем со презимето сè додека не го запозна принцот Хари“, изјавил тој.
Томас се осврнал и на прикажувањето на детството на Меган во серијата. Споменал дека секој ден ја земал од училиште или испраќал возач ако бил зафатен, нагласувајќи дека парите не биле проблем во нивниот дом и дека често вечерале во ресторани.
Серијата „Со љубов, Меган“ доби многу негативни критики по објавувањето. Серијата од осум дела, во која Меган готви со познати пријатели и нуди совети за хостинг, беше критикувана поради недостигот на содржина. Меѓутоа, гледачите ја оцениле позитивно, а Меган веќе најави втора сезона на емисијата.
